Balade 992 : Puis que tettine se moustra (MCCCCLXIX)
Balade sur les femmes qui troussent leurs tetins
Puis que tettine se moustra
En tous lieux si generalment,
Couvoitise en pluseurs entra
Pour le ravir couvertement.
5 Pour ce qu’il fait soubdainement,
Par veoir, maint cuer dolereux,
A de gens trouvé si crueulx
Que prins l’ont et mis a gehine
A Paris, c’est un cas piteux :
10 Dame, aiéz pité de tettine !
Car ce qui en ce point mis l’a
Est par jeunesse seulement.
Rons, petiz, durs, lors se cela,
Sanz moustrer si publiquement.
15 Puis s’abandonna folement,
Molz devint, lours, maugracieux,
Et pour ce, a esté mis en deux
Sacs cousus par my la poitrine, 448a
Estrains de cordes et de neux :
20 Dame, aiéz pité de tettine !
Ou certes en ce ploy mourra :
Tenus est trop estroictement.
Du delivrer grant bien sera
Et de lui faire aligement,
25 Car il seufre trop grief tourment
Pour avoir esté gracieux.
Amoureuses et amoureux
Qui d’amours sçavéz le couvine,
Faictes secours au langoreux :
30 Dame, aiéz pité de tettine !
L’envoy
Princes, qui ne le secourra,
En adventure se mettra
De saillir hors, prinson le mine,
Ou tous ses liens rompera.
35 Lors en fosse avaléz cherra :
Dame, aiéz pité de tettine !
