Balade 989 : Se Constantinoble perdi (MCCCCLXVI)
Balade morale sur le peuple, de la perdicion des roiaumes et des citéz par couvoitise et division
Se Constantinoble perdi
Et Romme par division
(Dont premierement descendi
Chevalerie, en union
5 Clergie en toute region)
Seignourie par leur orgueil,
Tant qu’ilz en sont moustréz a l’œil
Povres [et] desers et destruis,
Prince[1], pour ce prier vous vueil :
10 Penséz y tant comme je puis.
Et lors que chascun d’eulx tendi
Au bien commun d’affection
Et qu’envers tous le deffendi,
Que justice et pugnicion
15 Fut faicte sanz accepcion
De nul, que prudence ot escueil,
Qu’envie ne passa leur sueil,
Regnerent lors, si com je truis.
Princes, pour ce prier vous vueil :
20 Penséz y tant comme je puis.
Et s’aucun qui treu leur rendi
Des regnes en subjection,
Persevere es maulx que je di,
En orgueil, en elacion,
25 Puet il sa dominacion
Perdre comme eulx ? Oil, si dueil
Leur misere plus que ne sueil,
Dont tout seurs et certains suis. 447b
Princes, pour ce prier vous vueil :
30 Penséz y tant comme je puis.
L’envoy
Las ! amour, recodacion,
Pité, justice, affliction,
Revenéz toutes d’un acueil
Gouverner en dilection,
35 Ou tou va a perdicion,
Dont mains regnes sont ja a l’uis !
Princes, pour ce prier vous vueil :
Penséz y tant comme je puis.
[1] Raynaud corrige en Princes
