Balade 988 : Saul, Nabugodonosor (MCCCCLXV)
Balade comment les royas qui n’ont servi dieu ont perdu leurs royaumes
Saul, Nabugodonosor[1],
Jullius Cesar et Alixandre,
Coustantin, Priant et Hector,
Les Roumains qui tout firent rendre
5 Le monde a eulx, n’ont peu deffendre
N’en estat tenir leur conquest,
Pour ce qu’ilz n’ont pas esté prest
A Dieu servir et recongnoistre
Qui les roys des royaumes vest,
10 Exemple aux mondains et au cloistre.
Et du roy Pharaon encor,
Qui ne voult a Moyse entendre,
Mais endurcis fut comme une tor :
Trop voult ou peuple Dieu mesprendre,
15 Sanz son cuer a pité estendre
Par les plaies dont reprins est.
Au derrain lui voult faire arrest,
Dont mort fut, ce puet l’en congnoistre :
Gens perdit, terre et interest,
20 Exemple aux mondains et au cloistre.
Qu’a valu a tous leur tresor ?
Ne vault mauvais, qu’on ne doit prendre :
Science, prudence plus qu’or
Vault et fait seignourir le mandre.
25 Salemon voult ces deux apprendre
Et les requist : pour ce que c’est,
A tous les princes le droit vest
De gouverner. Ne vault une oistre
Le demourant, qui saiges n’est,
30 Exemple aux mondains et au cloistre.
Princes, vueilléz ces mos comprandre, 447a
Si que Dieux ne vous puist reprandre
Et corrigier par lui congnoistre,
Mais adviséz qu’il fist descendre
35 Saul et autres roys en cendre,
Exemple aux mondains et au cloistre.
[1] Ms. et N.
