Balade 987 : J’ay perdu mon entendement (MCCCCLXIII)
Balade
Le royaume qui se complaint a son roy
J’ay perdu mon entendement,
Je n’ay plus nulle congnoissance.
Toutes mes euvres sont d’enfant.
Je ne sçay que c’est de creance,
5 De foy, de loy. J’ai oubliance
Des vaillans hommes anciens.
Je suis sur tous impaciens.
En moy voulenté pour droit regne.
Grant dissipateur suy de biens.
10 Toute misere me gouverne.
Je n’ay nul bon gouvernement.
Vieulx suy, couvoitise s’advance,
Chascun mon avoir happe et prent,
Ne je n’ay certaine ordonnance
15 Pour relever perseverance.
De mal en pis praticiens
Couvoiteux ne me laissent riens,
N’entre bien et mal[1] ne discerne
Homme qui se die des miens :
20 Toute misere me gouverne.
Las ! ou sont ceuls premierement
Qui m’osterent de fole enfance
Et gouvernerent saigement ?
Que n’ont il de moy souvenance !
25 Las ! ou est honneur et vaillance,
Justice, les[2] princes sciens ?
Eslevéz sont les insciens
En maint pais et en maint regne.
Je n’ay mais[3] qu’ordure et fiens :
30 Toute misere me gouverne.
L’envoy 446b
Prince, je suy li regne tiens,
Qui par pechié a ma fin viens :
D’estan suis devenus cisterne.
Li temps n’est pas qu’Octoviens
35 Regnoit ! Que font les Crestiens ?[4]
Toute misere me gouverne ?
[1] Ms. BNF 6221 mal et bien
[2] Ms. BNF 6221 et les
[3] Ms. BNF 6221 maiz riens
[4] Ms. BNF 6221 Que font les Crestiens mq.
