Balade 986 : Quant l’en veult l’aumosne donner (MCCCCLXII)

Balade de ceuls qui refusent la paix au moustier

                        Quant l’en veult l’aumosne donner,
                        Et qu’en[1] y va pour son proufit,
                        La voit on pluseurs advancer :
                        L’un va boutant, l’autre maudit,
5                      Ne li uns a l’autre ne dit
                        « Passéz » ne ne feroit jamais
                        Fors en l’eglise Jhesucrit,
                        Quant chascun refuse la paix.
                       
                        La ne veult nulz premier passer,
10                    Ainçois y a maint contrdit,
                        Et quant vient a l’offrande aler,
                        L’un a l’autre en fait escondit.
                        Et qui y va, c’est grant despit
                        S’avant ne s’en fait prier, mais
15                    Je croy que raison s’esbahit,
                        Quant chascun refuse la pais.
                       
                        L’un l’offre a l’autre et fait porter,
                        Ne sçay qui l’ordonnance fit,
                        En jurant de la refuser :
20                    ― Prenéz ! ― Non feray. Chascun frit
                        D’avoir biens mondains tant qu’om vit,
                        Mais des biens Dieu du hault palais
                        Prandre et avoir sont desconfit,
                        Quant chascun refuse la paix.
                       
                        L’envoy
                       
25                    Prince, bien doit guerre regner,
                        Destruire et pugnir les mauvais
                        Au jour d’ui, et tout mal aler,                                                             446a
                        Quant chascun refuse la pais.

[1] Ms. que l’en