Balade 985 : Au jour d’ui court doubteuse maladie (MCCCLXI)
Balade sur les jaloux
Au jour d’ui court doubteuse maladie
Dont mainte gent ont esté entechié,
Jeunes et vieulx, par leur merancolie,
Sont et seront, et tout par leur pechié,
5 Qui doubtent fort qu’aucuns n’aient touchié
Au lieu secret dont ilz sont dolereux.
Toudis se craint tricheur qui a trichié :
Pluseurs sanz cause ont mal en leurs cheveulx.
Par fol cuidier leur vient ceste folie,
10 Et cuident voir tout ce qu’ilz ont forgié
Par le penser qui en dorment les lie.
A quoy ilz ont trop merancolie.
Un tel cuidant devroit estre lié
Com hors du sens, qu’onques cuers vertueux
15 N’ymagina en dame qu’amitié :
Pluseurs sanz cause ont mal en leurs cheveulx.
Et qu’avient il de tel forsenerie ?
Maint noble cuer de dame en est blecié,
Et le mari a honte et villenie,
20 Quant sanz raison a le fait escrié,
Dont il n’est rien. Advisent marié
Qu’ilz ne facent a leurs femmes n’a eulx
Tel deshonneur dont ilz sont reprochié :
Pluseurs sanz cause ont mal en leurs cheveulx.
L’envoy
25 Prince, par Dieu, cuer de noble lignie
Ne doit penser barat ne tricherie, 445d
Car qui le fait il est soup[e]sonneux :
Autrui ne croi, croire nel doit[1] on mie.
Nulz homs ne doit mal penser de s’amie ;
30 Pluseurs sanz cause ont mal en leurs cheveulx.
[1] Ms. Autrui ne croit croire ne le doit
