Balade 984 : Vouléz vous apprandre comment (MCCCCLX)
Balade pour reformer le monde en mieulx
Vouléz vous apprandre comment
Ce monde sera reformé
Et que tout yra autrement
Et mieulx qu’il n’a long temps alé ?
5 Lors ne serons plus ravalé,
Ne n’arons l’indignacion
De Dieu ne la pugnicion,
Guerre, mortalité ne plait :
Faisons donc en conclusion
10 Le contraire de quanqu’om fait.
Et que fait on presentement ?
Tous maulx, toute crudelité.
On rapine, on parjure, on ment.
L’un a l’autre fait fausseté,
15 En faingnant signe d’amisté.
Tout regne est en division.
Justice fault, loy et raison,
Quant l’en ne pugnit nul meffait.
Faisons donc en conclusion
20 Le contraire de quanqu’om fait.
Quel scisme a il trop longuement
En l’Eglise, c’est grant pité,
Par le mauvias gouvernement
Des suppos qui ont tout gasté !
25 L’un a vendu, l’autre achaté
Les biens Dieu : quel vendicion !
L’orgueil de tous, l’elacion,
Trop d’estas nous gastent ce fait :
Faisons donc en conclusion
30 Le contraire de quanqu’om fait.
Prince, je tien certainement 445v
Que paix et bon entendement
Revendront partout a souhait,
Mais que l’en face promptement
35 De bon cuer continulment
Le contraire de quanqu’om fait.
