Balade 983 : Puis que l’en voit par longue experience (MCCCCLIX)
Balade [445a] pour congnoistre service et soy adviser sur ycellui
Puis que l’en voit par longue experience
Que bien servir ne faire loyaument
A son seigneur, qu’i[1] n’en a congnoissance
Ne remerir ne veult aucunement,
5 Et a autres venuz soudainement
Donne le sien sanz cause et sanz desserte,
Son temps user en tel lieu n’est que perte.
On se doit lors retraire de lui, mais
Soubtilement et par voie couverte :
10 Soy departir vault mieulx tart que jamais.
Dont peut venir a homme de puissance
Et qui en soy a bon entendement,
Qu’il ne merit ses serviteurs d’enfance
Et qui servi l’ont continuelment ?
15 C’est foul plaisir venu en un moment
Et au surplus ingratitude apperte,
Qui ne congnoist la misere soufferte
Pour cieillesce qui leur vient desormais,
Qui jeune het, et pour ce je tien certe[2]
20 Soy departir vault mieulx tart que jamais.
O saint Bernart, l’epistre et ordonnance
Faicte par toy sur le gouvernement
D’ostel tenir, contient en sa substance
Qu’om doit paier et tout premierement
25 Ses serviteurs, et qui fait autrement,
Son ame en a puis sa mort grant soufferte,
Et quant la voie est a pluseurs ouverte
De ce sçavoir et l’en y met delais,
Retraire est bon. Tien tout vray ce proverbe :
30 Soy departir vault mieulx tart que jamais.
L’envoy
O serviteur qui servéz longuement
Sanz avoir don, office ou paiement,
Vous ne pouéz long tempssouffrir telz fais.
Adviséz vous pour vivre seurement, 445b
35 Et pourvoiéz a vostre sauvement :
Soy departir vault mieulx tart que jamais.
[1] Raynaud corrige en qu’il
[2] Ms. certes
