Balade 980 : Beau filz, belle fille et beau pere (MCCCCLVI)
Balade
Parole fainte et cuer pervers en douces paroules
Beau filz, belle fille et beau pere,
Biaus oncles, cousins, biaux nepveux,
Biau compains, belle suer, biau frere,
Belle cousine, biau filleux,
5 Biaux voisins s’appellent entr’eulx
Pluseurs en langage commun
Qui s’entraiment com chiens et leux :
On ne doit pas croire chascun.
Li[1] chiers filz treuve dure mere,
10 Li peres son chier filz crueux.
L’oncle son nepveu vitupere
Et ses nieps lui est rumoreux.
L’un plume a l’autre les cheveulx
Ou l’en cuide ce soit tout un.
15 Par derrier sont trop haineux :
On ne doit pas croire chascun.
Que font pluseurs a leur commere ?
Frere a seur ? Que fraint l’en de veux !
Doulz mos issent de bouche amere,
20 Mais le cuer les fait venimeux
Par les couraiges envieux
Des couvoitans l’autre sur l’un
Pour lese fuitis biens temporeux :
On ne doit pas croire chascun.
L’envoy
25 Prince, ce monde est perilleux,
Puis que baras regne entre ceulx 444c
Qui sont d’ung coing et venus d’un.
Soient clercs ou chevalereux,
Se bonne amour default entr’eulx,
30 On ne doit pas croire chascun.
[1] Ms. Car li
