Balade 979 : Je vi, encor n’a pas long temps (MCCCCLV)
Sote balade
Je vi, encor n’a pas long temps,
Un homme merveilles compter,
Qu’il avoit veu cent asnes blans,
Une truie un cerf pourceler,
5 Et qu’il avoit veu avaler
Le matin en guise du soir.
Lors dist un varlet haut et cler :
― Escoutéz, Monseigneur dit voir !
Le seigneur dist : "J’ay dyamens
10 Si gros com teste de sangler[1].
J’ay veu mille moulins moulens
Moudre sanz eaue et sanz venter.
J’ay vey un heran en la mer
Qui pouoit mille frans valoir :
15 Prins fust, tant[2] voulsisse donner.
― Escoutéz, Monseigneur dit voir !
― Je vis dix mille combatans
Par six hommes prandre et tuer,
Et .xiiiim. oliphans
20 De .iiii. brebis estrangler.
Je vy un toreau ressembler
A la fourme d’un chien tout noir,
Et vy les montaignes voler.
― Escoutéz, Monseigneur dit voir ! 44b
L’envoy
25 Prince doit amer ses sergens,
Quant ilz font ainsi leur devoir,
Disens de tout devant les gens :
― Escoutéz, Monseigneur dit voir !
[1] Ms. sanglier
[2] Ms. fut tant en
