Balade 981 : Ou est Nembroth le grant jayant (MCCCCLVII)
Balade comment ce monde n’est riens quant a la vie
Ou est Nembroth le grant jayant,
Qui premiers obtint seigneurie
Sur Babiloine, Ou es Priant,
Hector et toute sa ligne ?
5 Achillés et sa compaingnie,
Troye, Carthaige et Romulus,
Athene[1], Alixandre, Remus,
Jullius Cesar et li sien ?
Ilz sont tous cendre devenus :
10 Soufléz, nostre vie n’est rien.
Ou est David le combatant,
Judas Machabee et Urie ?
Ou est Charlemaine et Rolant,
Godefroy qui fut en Surie,
15 Baudouin, leur chevalerie,
Josué, Daires et Artus
Et ceuls qui conquirent le plus
Sarrazin, Juif et Crestien ?
Ilz sont mis en pouldre et corrups :
20 Soufléz, nostre vie n’est rien.
Ou est Atille le tyrant,
Caton plain de phillosophe,
Herculés, Jason conquerant,
Socratés et son estudie,
25 Augustin en theologie,
Le pouete Virgilius,
Es estoilles Tholomeus,
Ypocras le phisicien ?
De mort n’est d’eulx eschapéz nulz : 444d
30 Soufléz, nostre vie n’est rien.
L’envoy
Prince, il n’y a que les vertus,
Bien faire et esjouir ça jus
Et departir pour Dieu du sien
Aux povres, pour regner la sus.
35 Nos eages est tantost conclus :
Soufléz, nostre vie n’est rien.
[1] Ms. Athenes
