Balade 977 : Pour la corruption oster (MCCCCLII)

Autre Balade contre epidimie

                        Pour la corruption oster
                        De l’air ou temps d’spidemie,
                        Couvient ces remedes garder
                        Qu’om voist es lieux ou ce n’est mie :
5                      Qu’om main sobre et nette vie,
                        Qu’om boive vin cler, net et bon.
                        Poucins, perdris, faisans, chapon,
                        Connins, rost, viande legiere
                        Mangier, mais de grosses chars non,
10                    S’eschuer vouléz vostre biere.
                       
                        Pain de froment vous fault user
                        Bien cuit d’un jour, sans trop de mie.
                        Tout fruit cru et cuit rebouter.
                        Non dormir si non la nuitie.
15                    Safran, cannelle, espicerie,
                        Gingemble, blanc, graine et cloux non
                        User, vergus, jeune mouton,
                        Vinaigre, qu’om soit liéz qu’en quiere,
                        Lie gent de joieux renon,
20                    S’eschuer vouléz vostre biere.
                       
                        Nettes robes fault, frequenter
                        Plaisans lieux, bonne compaignie,
                        Nettement couchier et lever
                        En hault lieu, avoir a la fie
25                    Feu de genevre, et si vous prie,
                        Par brouillas n’isséz de maison.
                        Bonnes odeurs de garnison
                        Porter, qu’air mauvais ne vous fiere.
                        Ne hurtéz la noire toison,                                                                   443a
30                    S’eschuer vouléz vostre biere.