Balade 976 : Il vous fault pour vostre mesnage (MCCCCLI)
Autre Balade pour les nouveaulx mariéz et de leur mesnage
Il vous fault pour vostre mesnage
Entre vous, mesnagiers nouveaulx,
Coustes, coussins, liz et fourraige,
Fourmes, bans, tables, [et] tretiaulx,
5 Escuelles, poz, paelles, platiaulx,
Nappes et touailles de lin,
Cuevrechiefs, garnison de vin,
Buche, charbon, blef en grenier,
Feves, pois, gingembre et commin.
10 Penséz y, tout vous a mestier.
Foing, avoine, sel, courtillage,
Poree, lart, oingnons, poreaulx,
Chambres, tapis, carreaux d’ouvrage,
Quenoilles, hasples et fusiaux,
15 Aguilles, fil, soie ou luisiaux
Pour ouvrer, et de Chypre or fin.
Pour les dames cofres ou escrin[1],
Pour leurs besongnes herbergier,
Miroir, pigne a pignier leur crin.
20 Penséz y, tout vous a mestier.
Vergus, vinaigre, eufs et frommaige,
Torches, cire, cierges, flambiaux
Et chevaulx pour vo querriage,
Chaudiere, baingnoire et cuviaux.
25 Pour enfans fault bers et drapiaux,
Nourrice, chaufette et bacin,
Paellette a faire le papin,
Let et flour, lever et couchier,
Les apaisier soir et matin.
30 Penséz y, tout vous a mestier.
L’envoy
Mesnagier, encor est l’usaige, 442d
Et deust l’en emprunter sur gaige,
D’avoir vaisselle d’argent chier
Et d’or, puis qu’om est de parage,
35 Pour faire honeur a son linaige.
Penséz y, tout vous a mestier.
[1] Ms. estuit
