Balade 975 : Bien m’a li temps et nature, tous deux (MCCCCL)
Autre Balade [442b] du regret de jeunesse
Bien m’a li temps et nature, tous deux,
Mué mes meurs et mon gouvernement,
Car a vint ans fus gais et amoureus,
Plaint de chaleur et de foul hardement,
5 Jolis, joieux, sains et entreprenent,
Ne me chaloit de sens ne de folie :
Jusqu’a .xxx. ans force et cuider me lie,
Crespes et blons, vestus d’un seul pourpoint,
Dançant, chantant sanz craindre mort ne vie,
10 Mais je n’ay peu demourer en ce point.
A .xl. ans devins malicieus
Et m’avisay que j’eu fait folement.
Lors me retray de mes faiz perilleus :
A acquerir me mis terre et argent.
15 A grant doleur, a paine et a tourment,
Tiray .x. ans pour avoir seignourie.
[Mais asséz tost chey en maladie :][1]
Estomac froit ay trouvé[2] qui me point,
Mon jeune temps perdu lamente et crie,
20 Mais je n’ai peu deourer en ce point.
Devenus suis maigres, peléz, frilleux,
Po voyant, sourt, sec, annuieux, chargent,
Tousseux, roingneux, graveleux et gouteux,
Courbes du corps, po mangant, trop buvent.
25 Chascun jour ay un nouvel accident,
Bout en[3] costé ou autre maladie :
L’an .lx[4]. pour mourir me deffie
Qui a la fin de mon eage se joint.
Du jeune temps ay regret et envie,
30 Mais je n’ay peu demourer en ce point.
L’envoy
O foul cuidier, j’ay de[5] ta cuiderie !
Long temps m’as fait paier la muserie
En un espoir qui de moy se desjoint
D’estre jeunes et d’avoir chiere lie,
35 Sanz envieillir et sanz merancolie. 442c
Mais je n’ay peu demourer en ce point.
[1] Vers manquant restitué d’après le ms. BNF 6221
[2] Ms. froit trouuay
[3] Ms. BNF 6221 ou
[4] Ms. BNF 6221 de .xl.
[5] Ms. BNF 6221 jay creu
