Balade 974 : J’ay perdu doulz apvril et may (MCCCCXLIX)

Balade de doloir pour jeunesse qui s’en va ailleurs

                        J’ay perdu doulz apvril et may,
                        Printemps, esté, toute verdure :
                        Yver, janvier de tous poins ay
                        Garniz d’annoy et de froidure.
5                      Dieux scet que ma vieillesce endure
                        De froit et reume jour et nuit,
                        De fleume, de toux et d’ordure :
                        Toute maladie me nuit.
                       
                        Pour mon costé crie « Hahay ! »
10                    Mainte fois, et a l’aventure
                        Une migrayne ou chief aray[1],
                        Autre foyz ou ventre estorture,
                        En[2] l’estomac grieve[3] pointure.
                        Aucune fois le cuer me cuit,
15                    Autre heure tousse a desmesure :
                        Toute maladie me nuit.
                       
                        Tant qu’en lit me degetteray
                        Si qu’il n’y remaint couverture.
                        La crampe d’autre part aray
20                    Ou le mal des dens me court sure,
                        Ou les goutes me font morsure
                        Quelque part, ou ventre me bruit.
                        Toudis ay medicin ou[4] cure.
                        Toute maladie me nuit.
                       
                        L’envoy
                       
25                    Prince, de santé je vous jure
                        Que moult s’afoiblist ma nature
                        Pour maint grief mal qui me destruit[5].
                        Vieillesce m’est perverse et dure,
                        Ne je ne sçay comment[6] je dure :
30                    Toute maladie me nuit.

[1] Ms. BNF 6221 ay

[2] Ms. Ou en

[3] Ms. grief

[4] Ms. BNF 6221 en

[5] Ms. BNF 6221 destraint

[6] Ms. BNF 6221 comme