Balade 972 : Je lieve des le point du jour (MCCCCXLVII)
Balade a deux visaiges et la complainte avecques la response
Je lieve des le point du jour.
Je me couche a la nuit serree.
Pour servir n’ay nul temps sejour
Fors traveil chascune journee.
5 Vieulx suis : paine guerredonnee
De mon service n’a esté.
Je me sens povre[s] et en debte. 441c
Vieillesce et misere me point.
― Tu es foulz, c’est grant povreté,
10 Fay bien, l’en ne t’en fera point.
― Vous me notéz tristesce et plour.
Ma peine m’yert remuneree.
Autrement seroit deshonnour,
Ingratitude en maistre nee.
15 ― Tu parles du viel temps Enee :
Ceuls qui moins font, qui ont cousté,
Puis qu’en jonesce sont bouté
Et plaisance avec[1] eulx se joint,
Ont richesce, et tu meleurté,
20 Fay bien, l’en ne t’en fera point.
Tu vois bien que morte est honour,
Congnoissance s’en est alee.
Soy travillier n’est que folour,
L’ancienne loy est foulee.
25 Repos et aise ont la donnee ;
Travail n’a fors qu’adversité.
Bien faire est souvent despité.
Povre robe a mauvais pourpoint.
Service le[2] tient en vilté.
30 Fay bien, l’en ne t’en fera point.
L’envoy
Prince, quant j’ay bien escouté
Ce que Despit m’ot recité
Et ce que Coustume y adjoint,
Je trouvay qu’el dit verité ;
35 Ce mot tien pour auctorité :
Fay bien, l’en ne t’en fera point.
[1] Ms. avecques
[2] Raynaud corrige en se
