Balade 971 : Sur tous les biens que Nature donna (MCCCCXLIV)

Balade amoureuse

                        Sur tous les biens que Nature donna
                        Puis qu’elle fut en ce monde ordenee,
                        Cent mille fois plus donné vous en a
                        Qu’onques ne fist a creature nee,
5                      Dame, de qui court si grant renommee
                        Que chascuns dit que vous estes la flour
                        D’umilité, de beauté et d’onnour.
                        Et je le sçay par vraie experience,
                        Tant qu’il n’est homs ne fust ferus d’amour,
10                    S’estre pouoit toudis en vo presence.
                       
                        Car vraiement si gente vous forma
                        Qu’a corps humain n’a tel forme donnee :
                        Humble regart et blont chief vous donna,
                        Viaire doulz et face coulouree,
15                    Mais sur toutes estes bien acesmee :
                        Noble chose est de veoir vostre atour.
                        Vo gent maintien, vo parler de douçour
                        Fiert si chascun de l’amoureuse lance
                        Que nulz mourir ne pourroit jamais jour,
20                    S’estre pouoit toudis en vo presence.
                       
                        Et par ma foy bonneuré sera
                        Cilz qui ara mis en vous sa pensee,
                        Car en tout bien son corps faire pourra                                           440d
                        Et par vo bien acquerir renommee :
25                    Par un seul mot dire, s’il vous agree :
                        « Amis » sanz plus, ara toute valour,
                        Et ne fera jamais nulle folour.
                        Mais en ce mot aroit tele esperance
                        Qu’il cuideroit valoir un emperour,
30                    S’estre pouoit toudis en vo presence.