Balade 970 : Il est bien foulz qui s’amortit (MCCCCXLII)
Balade comment homme ne femme ne se doit amortir a ses enfans
Il est bien foulz qui s’amortit
A homme n’ enfans qu’il ait,
Et qui tout comme il puet ne vit
Franchement et qui ne se fait,
5 Tousjours du sien seigneur parfait
Sanz le bailler en autrui mains,
Destruis en sont maintes et mains,
Vilz tenus, affoléz des corps,
Qui en meurent povres et vains :
10 Qui s’amortit, pis vault que mort[1].
Car sanz cause autruy enrrichit.
Son franc couloir, sa terre lait,
Ses meubles, puis l’ont en despit
Ses enfans : mangier puet du lait.
15 On le het, chascun lui dit lait.
Deschaux est, dessiréz, dessains,
Mal put, mal vestu, petit crains
Et de grans reprouches a lors,
Claméz des siens or vilz villains :
20 Qui s’amortit, pis vault que mors.
Mais tant que le sien[2] seignourit,
On lesert, nulz ne lui meffait,
On l’aime, on craint, on l’obeit,
Tant soit vieulx. S’il a bon retrait,
25 Ses hoirs ne lui font nul faulx trait
Pour doubte qu’il ne soit abstrains 437c
De vendre ou donner. C’est plus sains
Que le donneur qu’om chace hors.
Ne vous tuéz pour voz prouchains !
30 Qui s’amortit, pis vault que mors.
L’envoy
Prince, de grant folie est plains
Qui s’amortit, et petit plains,
Et s’il a angoisse a effors,
C’est a bon droit s’il est restrains :
35 Soit tousjours hoirs du sien certains ;
Qui s’amortit, pis vault[3] que mors.
[1] Raynaud corrige en mort
[2] Ms. siens
[3] Ms. il vault pis
