Balade 966 : Comment te pourroit bien venir (MCCCCXXXV)
Autre Balade
Comment te pourroit bien venir,
O lerres faulx et couvoiteux,
Lasches de corps ? De souvenir
Est temps de tes vices crueulx :
5 Souvent as ravi comme uns leux,
Saichans que tu faisoies mal,
Oultre raison, en general,
Nobles, bourgois, le bien commun : 435c
Le vengier vient especial,
10 Car tu es haiz de chascun.
On te quiert partout pour pugnir,
Va t’en en un desert tous seulz,
Se saiges es, sanz revenir.
Je tien que c’est uns bons conseulx :
15 N’atten ne quatre moys ne deux,
Devien taupe en prez ou en val.
Adés queurt Justice royal :
Il fait bon fuir le temps brun,
Et tu n’as pas été loyal :
20 Car tu es haiz de chascun.
Nulz prodoms ne te doit souffrir.
Tu es tousjours tresperilleux
Serpens, de la langue ferir
Scez par derrier com venimeux.
25 Tu es a chascun haineux,
Pis que de crime capital,
Aux champs, a piet et a cheval.
Noiéz fusses tu en un flum
Ou panduz a un carquenal !
30 Car tu es haiz de chascun.
L’envoy
Mauvais, faulx, ingrat, oultrageux,
En tous tes faiz suspeçonneux,
Tu ne fus onques bien tout un,
Mais a joué de doubles neux.
35 Bien dois estre mas et honteux,
Car tu es haiz de chascun.
