Balade 965 : Mesiau pourry, faulx parjure et yvroingne (MCCCCXXXIV)
Balade
Mesiau pourry, faulx parjure et yvroingne,
Menteurs pervers, de trestouz vices plain,
Prevaricat, entroingneux de besoingne,
Discordieux, envieux soir et main,
5 […]
Tu ne penses tousjours qu’a tricherie,
Gloux en patler et glouz en lecherie,
Povre d’amis, de meuble et de demaine,
Dont le peuple a sur toy prophecie
10 Que brief mourras de mort laide et villaine.
Chascuns te het et veoir te ressongne,
Car tous tes faiz sont or, lait et villain.
Qui te congnoist de toy a grant vergoigne,
T’orde vie te brasse un fort levain.
15 Mesdit n’as pas des preudommes en vain 435b
N’esté ingrat, pour bien rendre folie
Perseverent, dont Vengence te lie,
Faisant un fais de telz maux qu’elle amaine
A Justice, qui partout certifie
20 Que brief mourras de mort laide et vilaine.
Le glaive as quis, et mis en ta queloingne
Les estoupes pour toy destruire a plain.
D’autel et pis finera ta charoingne
Comme fait as, tien ce pour tout certain :
25 De Suzanne as mal perceu le claim
Des faulx prestres l’accusans par envie,
Des faulx tesmoings que Daniel escrie :
En separant les convainqui en payne
De mort cruel, et ce a touz signifie
30 Que brief mourras de mort laide et vilaine.
L’envoy
Homs reprouchéz, nourris en villenie,
De meurs mauvés, de perverse lignie,
Que tout homme moustre au doit et enseigne :
Pour tes pechiéz il ne tardera mie
35 Que la chose sera toute acomplie
Que brief mourras de mort laide et villaine.
