Balade 964 : Lettres des escoliers d’Orliens (MCCCCXXXIII)
Lettres des escoliers d’Orliens et comment ilz mandent argent et salus a leurs peres
[Lettres des escoliers d’Orliens] :
Treschiers peres, je n’ay denier,
Ne sanz vous ne puis avoir riens.
Et si fait a l’estude chier,
5 Ne je ne puis estudier
En mon Code n’en ma Digeste :
Caduque sont. Je doy de reste
De ma prevosté dix escus,
Et ne treuve homme qui me preste :
10 Je vous mande argent et salus !
Trop fault, qui est estudiens,
Se son fait veult bien advancier,
Il fault que son pere et les siens
Lui baillent argent sanz dangier,
15 Par quoy cause n’ait d’engagier
Ses livres, ait finance preste,
Robes, pannes, vesteure honneste,
Ou il sera uns malostrus,
Et qu’om ne me tiengne pour beste,
20 Je vous mande argent et salus.
Vins sont chiers, hostelz, autres biens. 435a
Je doy partout. S’ay grant mestier
D’estre mis hors de telz liens :
Chiers peres, vueilléz moy aidier.
25 Je doubte l’excommunier,
Cité suy. Cy n’a n’os n’areste[1] :
S’argent n’ay devant ceste feste
De Pasques, du moustier exclus
Seray. Ottroiéz ma requeste.
30 Je vous mande argent et salus.
L’envoy
Treschiers peres, pour m’alegier
En la taverne, au boulengier,
Aux docteurs, aux bediaus, conclus,
Et pour mes colectes paier
35 A la burresse et au barbier,
Je vous mande argent et salus.
[1] Ms. ne areste
