Balade 968 : Offices des hostelz royaux (MCCCXXXVII)
Balade des offices des hostelz, c’est assavoir panneterie, eschançonnerie, cuisine[1], fruiterie et fourriere
Offices des hostelz royaux,
C’est assavoir panneterie,
Cuisine atout voz grans boyaux,
Escurie et la fruiterie,
5 Fourriere contre qui l’en crie
Pour les logiz souventefois,
Soiéz l’un a l’autre courtois ;
Mais je vous conseille en la fin,
Pour mieulx attemprer vostre voix
10 Faictes obeissance au vin.
Car telz offices e[s]t tresbiaux
Et ly noms d’eschançonnerie :
Chapons rostiz, boucs ne veaulx
Ne sausses de la sausserie
15 Sanz vin n’est c’une moquerie :
Avoine et foing, poires et nois
Ne logis ne vault .ii. tournois
Sanz ce hault poete divin,
Bachus, et pour ce que c’est drois,
20 Faictes obeissance au vin.
On est content pour .ii. morsiaux
De pain : s’en boit on mainte fie
A ces tasses, voirres, vessiaulx
A l’usance de Normandie.
25 Sanz vin tout office mandie,
Mais par li e l’en char et poys,
Pain, brouet, avoine et tremoys,
Lumiere, fruit soir et matin, 436b
<Fuerre, estraing, gingembre et connin>[2]
Buche et charbon ; tous les galoys,
30 Faictes obeissance au vin.
L’envoy
Chambre aux deniers, gaiges du moys,
Tous offices et ceulx[3] de boys,
Queux, escuiers, li galopin,
Chapellains, nobles gens, bourgoys,
35 Escuiers, clercs, gardéz vos loys[4],
Faictes obeissance au vin.
[1] Raynaud supplée ecurie
[2] Vers surnuméraire
[3] Ms. a ceulx ; Raynaud corrige en ceulz
[4] Ms. lays
