Balade 961 : He ! oroison, abstinence et pité (MCCCCXXX)
Balade de grant devocion
He ! oroison, abstinence et pité,
Repentence, plour et contriction,
Penitence, aumone et charité,
Congnoissance, saincte confession, 434a
5 Et aprés ce perseveracion
En l’amour Dieu et soy[1] de mal garder,
Vueilléz a moy venir et resgarder
Qui en peril suy d’estre [condampnee]
Et les vertus avec vous admener
10 Pour mon confort, ou je seray dampne[e].
Vueilléz aussi, treshumble humilité,
Souvenance, foy, recordacion
Cent foiz le jour de la crudelité
Du doulz Sauveur et de sa passion,
15 Ce qu’il souffrit pour no redempcion,
Que nulz ne peut et en doit ignorer,
Fay moy sa mort et son sang savourer,
Ou je me voy de trop male heure ne[e],
S’esperance ne vient a moy parler
20 Pour mon confort, ou je seray dampnee.
Qui pleine suy d’orgueil, d’iniquité,
D’avarice, d’abominacion,
De tous vices, de variableté
De mal en pis a ma destruction.
25 Je voy ma fin et ma conclusion,
Ne je ne puis un tresbrief temps passer
Qu’il ne faille mon nom perdre et casser,
Que Dieu avoit par Clovis adoupte[e] :
Tous mes enfans, vueilléz a ce penser
30 Pour mon confort, ou je seray dampne[e].
L’envoy
Prince, face Dieu[2] justice regner,
Le bien commun et l’eglise honourer,
Car sur ces trois m’a Dieux faicte et fondde.
Mais ilz faillent, lors me fauldra finer ;
35 Or vueilléz donc ces trois poins admener
Pour mon confort, ou je seray dampnee.
[1] Ms. foy
[2] Ms. pour dieu face ; Raynaud édite face Dieux
