Balade 960 : O minieres d’or et d’argent (MCCCCXXVIII)
Autre Balade comment touz maulx ont regné depuis[1] que les minieres d’or et d’argent furent descouvertes
O minieres d’or et d’argent,
Mal fustes onques descouvertes
Pour mettre guerre entre la gent,
Envie et haines couvertes !
5 Avant que vous fussiéz ouvertes,
Le peuple en vraie paix vivoit 433b
Des grains et des fruis qu’il avoit,
En vraye amour et general.
Mais chascun dit qui vous congnoit :
10 Or, argent sont cause de mal.
Car des que fustes apparent,
Couvoitise et baras pourtrettes,
Division, noise et content
Furent par tout le monde certes,
15 Chasteaulx fondéz, forces appertes,
Car le fort au faible toloit
Et par tyrannie acqueroit
Ce qu’il avoit dedans son pal :
Dont il s’en suit, qui bien y voit,
20 Or, argent sont cause de mal.
Qui tousjours [vous] va cumulant,
Vous estes aux mauvais offertes
Qui en font le peuple indigent.
Toutes fussiéz vous recouvertes !
25 Moien, povre[2] ont trop de souffrettes
Par vous : on vous aoure et croit.
Chascun qui vous a vous conjoit,
Pappe, roy, prince et cardinal,
Dont tout saige conclure doit :
30 Or, argent sont cause de mal.
L’envoy
Prince, vivéz liberalment,
Sanz querir excessivement
Tel or, faictes loy communal
Venir, aler en paiement
35 Pour vostre estat, car vraiement
Or, argent sont cause de mal.
[1] Mot doublé par le copiste
[2] Ms. povres
