Balade 954 : Le prince de haulte eloquence (MXXXXV)
Balade
Le prince de haulte eloquence,
Seigneur des nouvelles trover,
A tous ceuls qui oeuvrent en ce
Et qui s’i scevent esprouver,
5 Salut ! Fait avons ordonner 415b
Un parlement l’an une fois,
En may, droit a Lens en Artois,
Ou chascuns qui se scet entendre,
Vendra vers nous en cellui mois,
10 Pour compte de ses bourdes rendre.
Mais par quoy n’y ait oublience,
Maisonselles, vous fault porter,
Mignot, Cuisy, en la science,
Nostre edit, maistres en parler,
15 Et Bonnancourt, pour l’exposer
Et lire a tous de haulte voys,
En adjournent ceuls a noz drois
Qui seront dignes d’estat prandre :
Chascun d’eulx sera au hault dois,
20 Pour compte de ses bourdes rendre.
De ce vous donnons la puissance.
N’en vueilléz nul entreporter,
Informéz de sa suffisence,
Qu’om ne face au jour appeler.
25 Car qui mieulx y sçara jangler,
Couronnéz sera comme roys.
Mais rescripvéz de voz exploys,
Si qu’om ne vous en puist reprendre.
Car sur chascun arons le chois,
30 Pour compte de ses bourdes rendre.
L’envoy
Compaignons, du bec afiler
Et de merveilles controuver
Penséz, des nouvelles aprandre :
Par ce vous feréz courronner.
35 La se puet chascun eslever,
Pour compte de ses bourdes rendre.
