Balade 955 : Qui fait la science acquerir (MCCCCXXII)

Balade

                        Qui fait la science acquerir ?
                        Qui fait chevalerie aler ?
                        Qui fait marchandise courir ?
                        Qui fait conclusion d’amer ?
5                      Qui fait vaisseaulx courir par mer ?
                        Qui fait paix et guerre entre gent ?
                        Qui fait le prince renommer ?
                        Tout se fait par force d’argent.
                       
                        Qui fait les chasteaulx assaillir ?
10                    Qui fait gens d’armes assembler ?
                        Qui fait royaumes envahir ?
                        Qui fait benefices donner ?
                        Qui fait la terre cultiver ?
                        Qui fait feste et deduit souvent ?
15                    Qui fait chacer ? Qui fait voler ?
                        Tout se fait par force d’argent.
                       
                        Qui fait au monde seignourir ?
                        Qui fait empires conquester ?
                        Qui fait maint malade guerir ?                                                           431b
20                    Qui fait dancer ? Qui fait jouster ?
                        Qui fait les advocas parler ?
                        Qui fait maint atour bel et gent ?
                        Qui fait homme vivre et regner ?
                        Tout se fait par force d’argent.
                       
                        L’envoy
                       
25                    Princes, qui fait gens eslever ?
                        Qui fait en grace demourer ?
                        Qui fait fonder croce et couvent ?
                        Qui fait son desir achever ?
                        Tout se fait par force d’argent.