Balade 953 : Je voy le temps Octovien (MCCCXCIV)
Autre Balade
Je voy le temps Octovien
Que toute paix fut reformee,
Je voy amer le commun bien,
Je voy justice estre gardee,
5 Je voy Saincte Eglise essaucee,
Chasteté[1] en religion,
Bonnes euvres, devocion,
Charité[2], foy, droit jugement
Faire et tenir sanz fiction.
10 ― Dit il voir ? ― Par ma foy, il ment.
Honouré sont li ancien,
Paine est aux bons remuneree ;
L’un[3] a l’autre ne meffait rien,
Couvoitise est desracinee
15 Des cuers des gens, verité nee,
Vray conseil en conclusion
Es grans clers en prelacion, 391a
Qui tous veulent soufrir tourment
Pour l’Eglise estre en union.[4]
20 ― Dit il voir ? ― Par ma foy, il ment.
Il souffist a chascun le sien
Sanz faire prinse diffameen,
Et de tenir estat moien,
Sanz orgueil querir[5] renommee.
25 Par[6] faire bien[7] estre en armee,
Justement user de raison,
Non meffaire a[8] autrui maison
Ne qu’a son propre tenement.
Telz gens[9] queurt[10] il, ainsi fait on.
30 ― Dit il voir ? ― Par ma foy, il ment.
L’envoy
Princes, li vaillant et li bon
Sont eslevéz, vueillent[11] ou non.
Estat ont et[12] gouvernement,
Et li foul, orgueilleus felon,
35 N’ont estat, office ne don.
― Dit il voir ? ― Par ma foy, il ment.
[1] Ms. BNF 1619 Chasté
[2] Ms. BNF 1619 et 6221 Franchise
[3] Ms. BNF 1619 Nul
[4] Ms. BNF 6221 Pour Dieu qui souffri passion corrigé en Pour l’Eglise mettre en union
[5] Ms. BNF 1619 Avoir orgueil sanz
[6] Raynaud corrige en Pour ; le ms. Toulouse donne Par
[7] Ms. BNF 1619 bien faire
[8] Ms. BNF 1619 en
[9] Ms. BNF 1619 et 6221 temps
[10] Ms. BNF 1619 si court
[11] Ms. BNF 1619 veullés
[12] Ms. BNF 1619 Et ont tout le
