Balade 950 : Uns paisans avoit un chien (MCCCXCI)
Autre Balade d’un paisant et d’un chien[1]
Uns paisans avoit un chien 390a
Qu’en jeunesse n’ot son pareil.
Tant fut hardi, tant chaçoit bien
Que par tout soubmist a son vueil
5 Beste, tant fut plaine d’orgueil.
Pour ce l’ama ly paisans.
Mais quant li chiens devint pesans,
Et que sa force declina,
Lors l’enhay et villena ;
10 Son pain lui restraint et potaige,
Mal pour bien lui guerredona :
Advisent cy tuit foul et saige.
― Las ! dit le mastin ancien,
Maistre bien reprouver vous vueil,
15 Quant par moy ne perdistes rien,
Et nul n’osa passer vo sueil
Pour rober. Des laies me duel
Que j’ay eues aux hois et champs[2]
Des cerfs, des loups, des cengliers grans,
20 Dont maint par moy vie fina.
Mes corps bien vous acuisina,
Dont je deusse avoir mon viaire,
Mais quant fruit fault, nul guerdon[3] n’a !
Advisent cy tuit foul et saige[4].
25 Son temps pert, jeunesce et le sien
Qui mauvais sert, s’il n’a escueil
D’estat, office ou d’autre bien
Pour vivre soy, que viel n’ait dueil.
Et pour ce a tous enseignier vueil
30 Que, quant ilz seront jeusnes d’ans,
Qu’ilz soient d’acquerir aidans
Lieu et terre ou chascun yra,
Quant la viellesce le prandra,
Pour vivre frans en son mesnage,
35 Ou au chien comparéz sera :
Advisent cy tuit foul et saige[5]. 390b
L’envoy
Princes, servens qui servira
Ceste fable a euvre mettra,
Pour avoir rente ou heritaige
40 En son jeusne temps, qui pourra,
Ou lui viel trop de maulx avra :
Advisent cy tuit foul et saige.
[1] Sujet traité galement dans la balade MCCLIII
[2] Ms. aux champs
[3] Ms. guerredon
[4] Ms. tuit li foul et li saige
[5] Ms. tuit li foul et li saige
