Balade 949 : Or est le Bruth concordant a Sebile (MCCCXC)
Autre Balade par maniere de prophetie
Or est[1] le Bruth concordant a Sebile
Es granz palus et es las[2] des Frommis
Que Breuth n’aroit plaine, reçoit ne ville[3]
Par le Lion dont ilz sont ennemiz,
5 Puis que le Cerf Volant les avra mis
Ains .xiiii. ans a grant confusion[4].
L’Asne Pesant sauldra hors d’Albion.
D’un des costéz courra la fourmiere.
Combatre doit[5] encontre le Lion :
10 La doit Bruthus estaindre sa banniere[6].
Le Cerf Volant a la teste subtile,
Quant il sçaura l’Asne sur le pastis[7],
De son bestail fera venir[8] maint mille.
[Ou lac desert sera grant ly estris] :[9]
15 Cerf et[10] sangliers, liepars contre le Lis
Se[11] combatront. Grief tribulacion
Sera entr’eulx et grant confusion[12].
Du sang des mors courra une riviere :
Onques ne fut si grant occision[13],
20 La doit Brutus estaindre sa banniere[14].
Le cisme grant fait[15] contre l’Euvangile
Terminera par la mort des occis.
Ne Dieux n’avra[16] fors uns seule fille.
Le mauvais sang la doit estre peris,
25 Le Cerf Volant en doit eschaper vis.
L’Asne Pesant querra sa region
Pour reposer, mais en l’invasion[17]
Du[18] Cerf Volant saudra de sa bruiere,
Le corps perdra, terre et possession :
30 La doit Brutus estaindre sa banniere.
[1] Ms. BNF 6221 vient
[2] Raynaud corrige en ou lac
[3] Ms. BNF 6221 Que brief naront maison recpt ne ville
[4] Ms. BNF 6221 destrucion
[5] Ms. BNF 6221 Pour soy drecier
[6] Ms. BNF 6221 lumiere
[7] Ms. BNF 6221 lestre sur les chetifs
[8] Ms. BNF 6221 assemblera
[9] Vers manquant restitué d’après le ms. BNF 6221
[10] Ms. BNF 6221 De cerfs
[11] Ms. BNF 6221 La
[12] Ms. BNF 6221 effusion
[13] Ms. BNF 6221 confusion
[14] Ms. BNF 6221 lumiere
[15] Ms. BNF 6221 fait grant
[16] Ms. BNF 6221 Lors nara Dieus
[17] Ms. BNF 6221 Pour repasser maiz par envasion
[18] Ms. BNF 6221 Le
