Balade 948 : Les prophetes du temps passé (MCCCLXXXIX)
Autre Balade 389c
Les prophetes du temps passé,
Les .xii. apostres Jhesucrit
Et leur disciple trespassé,
Li saint homme qui ont escript
5 Aux roys, aux peuples et descript
Tant d’adversitéz qui venrront
A ceuls qui griefment pecheront
Sanz repentir, ont fait grant bien
A ceuls qui s’en admendemront.
10 C’est bien dit, mais on n’en fait rien.
Pour guerre, pour mortalité,
Pour doubte de corps, d’esperit,
Pour vengence qui ait esté,
L’en ne quiert qu’argent et proufit
15 Mondain, et a l’en en despit
Le commun bien. Ceuls qui ce font
Dient que les choses mal vont
Et que l’en y pourverra bien,
Mais quant plus y pense en parfont,
20 C’est bien dit, mais on n’en fait rien.
Prescheurs preschent la verité
Aux gens chascun jour. ― C’est bien dit,
Ce dient, et bien sermonné.
Mais riens ne se fait de leur dit.
25 […][1]
Benois ceuls qui Dieu serviront
Et qui du leur departiront
A ses povres. Ce mot retien,
Car paradis desserviront :
30 C’est bien dit, mais on n’en fait rien.
L’envoy
Princes, chascun se tient chargé
En conscience de peché,
Disant que tout vray crestien
Doit faire aumosne et charité
35 Et l’un de l’autre avoir pité. 389d
C’est bien dit, mais on n’en fait rien.
[1] Vers manquant
