Balade 947 : Quelz nouvelles de l’Union (MCCCLXXXVIII)
Autre Balade sur le fait de l’union
Quelz nouvelles de l’Union ? 389b
Seront ces deux pappes d’acort
Qui font par tout division,
Dont toute guerre et tout mal sort ?
5 Nennil, chascun a trop de port,
Trop d’auctorité et d’estat.
Roy les soustiennent, et prelat
D’y pourveoir sont negligent.
Quant cessera donc ce debat ?
10 Quant il ne sera plus d’argent.
Causee est la dissencion
Pour les dons et pour le rapport
Des benefices, ce dit on,
Que Giézy fait tenir a tort
15 A pluseurs. Congnoissance dort.
Joyaulx d’or, escuelle et plat,
Diziesmes dont pluseurs sont plat,
Font ce triboul entre la gent,
Mais desconfit seront et mat,
20 Quant il ne sera plus d’argent.
Car lors selon m’opinion
Couvoitise et couvoiteux mort
Soient. Par ce l’elacion
D’orgueil cherra et le confort ;
25 De povreté revendra fort
Humilité en son climat.
Compte, or et finance s’abat
Qui font tout le monde indigent.
Plus ne seront com chien et chat,
30 Quant il ne sera plus d’argent.
L’envoy
Prince, toute sousvencion,
Gage excessif, grant pencion,
Estas, dons faiz folagement,
Orgueil, envie et traison
35 Yront tous a perdicion,
Quant il ne sera plus d’argent.
