Balade 946 : Puis que je voy la Loy qui est le chief (MCCCLXXXVII)
Autre Balade
Puis que je voy la Loy qui est le chief
Et ses membres, Droit, Raison et Justice,
Aux quelz chascuns par les vices fait grief,
Dissimuler chascun en son office,
5 Sanz excercer son propre benefice, 389a
En declinant pour faveur ou pour paine,
Sanz nul pugnir, Science est vuide et vaine
Au temps qui court : dont a m’oppinion
Elle devroit tenir une autre athaine
10 Pour commencer nouvelle region.
Car Loy et Foy n’est fors que le relief
D’aucuns errans en fausseté et vice.
Deux hommaiges sont ou il n’a c’un fief
Par le moien d’orgueil et d’avarice.
15 Que fait Raison ? Elle taist comme nice
Le voir[1] par tout. Et s’aucun droit ramaine
Justice faint. L’espee Charlemaine,
Si comme el suelt, ne fait pugnicion,
Et les climas sont en voye certaine
20 Pour commencer nouvelle region.
Consequence le moustre de rechief
Par les aages dont chascun ot esclipse.
En revenant or vient le terme brief
De cest aige couvoiteux en malice :
25 Des deix commans ne tenons banc ne lice,
Ne celle paix, que l’ange en la montaigne
Aux bien crans donna en terre plaine,
Quant Dieux nasquit, n’est pas en union.
Et par ces poins le ciel et tout se paine
30 Pour commencer nouvelle region.
L’envoy
Prince, l’en voit mainte chose soudaine,
Signes du ciel, vengence souveraine
Qui s’apperent pour no pugnicion
De jour en jour, et n’est qui garde y praingne :
35 S’ay grant paour que grant mal ne nous viengne
Pour commencier nouvelle region.
[1] Ms. voit
