Balade 945 : Comment se puet homs ordonner (MCCCLXXXVI)
Balade comment le meilleur est faire tout le contraire de tout ce que nous faison a present
Comment se puet homs ordonner
En ce temps de desordonnance,
Ou chascun veult habandonner
Cuer et corps, par fole plaisance
5 A orgueil, a oultrecuidance,
A parler oultrageusement,
A couvoitier desloyaument
Le peché de char qui est lours ?
Tresbien, vez cy coye comment : 388d
10 Fay de quanqu’om fait arrebours.
[…][1]
Car toute personne s’advance
De faire mal, Dieu non doubter
Qui tous nous fist a sa semblance,
15 D’en avoir pou de ramenbrance,
De mal croire en son sacrement,
De pou penser au sauvement,
D’avoir en lui foy et recours.
Mais se vivre veulz dignement,
20 Fay de quanqu’om fait arebours
Las ! je voy touz vicesregner,
[Et] la foy branle et la creance,
Touz royaumes perseverer
[…][2]
25 Crestiens estre en grant balance
Par ce qu’om ne fait saigement.
Raison n’a lieu, loy, jugement
Au jour d’ui en quelconques cours.
Dont pour eschuer dampnement,
30 Fay de quanqu’om fait le rebours.
L’envoy
― Compains, je te vueil demander
Se ma vie puis amender
Par ce derrain ver qui est cours ?
― Oil, se tu y veulz penser.
35 Pour bien vivre et l’ame sauver,
Fay de quanqu’om fait le rebours.
[1] Vers manquant
[2] Vers manquant
