Balade 943 : Merveille est de l’entendement (MCCCLXXXII)
Autre Balade
Merveille est de l’entendement
Au jour duy de nature humaine,
Qui laisse maint doulz instrument
Pour cellui ou plus a de paine,
5 Dont souloit user gent villaine
Et ceuls qui font les balesteaux.
Comment puet telz jus sembler beaux
A noble cuer ? Dont vient tel pompte ?
Nulz n’a cure des chalumeaulx :
10 Chascun veult jouer de la trompe,
Qui sonne si horrblement,
Et lui fault tant bailler d’alaine
Que trop suis esbahy comment
Saiges homs a tromper se paine.
15 Car sur le corps n’a nerf ne vaine
Qui n’emfle visaige et boyaulx, 388a
Et, qui regarde bien sur ceaulx,
Il semble que chascun d’eulx rompe,
Et neantmoins es cours royaulx
20 Chascun veult jouer de la trompe.
Guisterne, rebebe ensement,
Harpe, psalterion, douçaine
N’ont plus amoureux sentement,
Vielle fleuthe traversaine,
25 Mais en terre, en mer et en Saine,
Entre dames et damoiseaulx,
Clers, marchans et vendeurs d’oiseaulx,
N’est nulz prisiéz, se fort ne trompe :
Sauf d’Avignon les curiaulx,
30 Chascun veult jouer de la trompe.
L’envoy
Prince, viellars et jouvenceaulx,
Courretiers, sergens et bedeaulx,
Nulz d’eulx n’est qui ne se desrompe
De tromper. Marchans de chevaulx,
35 De brebis, de vaches, de veaulx,
Chascuns veult jouer de la trompe.
