Balade 942 : Depuis le diluge qui fu (MCCLXXI)

Autre Balade

                        Depuis le diluge qui fu
                        Et la grant inundacion
                        Du temps Noé, ou tout mouru
                        Fors que sa generacion,
5                      Et puis que la confusion
                        Des langues sur la tour Babel
                        Se fist, chascun en un tropel
                        Suy la langue qu’il parloit,
                        Et lors fut un monde nouvel
10                    Que nous n’avons ne bon ne bel :
                        Au jour d’ui nul ne se congnoit.
                       
                        Ce peuple simplement vescu
                        Par long temps sanz decepcion
                        Des fruiz, des glans. Li courant ru
15                    Fut leur boire et potacion.
                        Leur lit, leur habitacion
                        Estoit soubz arbres. Ly rainsel                                                           387d
                        Furent leur toit et couversel.
                        Blef, vin, or, argent ne couroit,
20                    Chars de buef, de porc ne d’aingnel.
                        Autrement va : le monde est fel,
                        Au jour d’ui nul ne se congnoit.
                       
                        Aprés est malice venu
                        Qui fist mangier char et poisson,
25                    En terre a charrue feru,
                        Planté vigne, trové moisson,
                        Seignourie et possession,
                        Fondé chasteauls. Arc et carrel,
                        Fauchons, espees et coustel
30                    Couvoitise querre faisoit
                        Pour avoir argent a moncel :
                        Couvoiteux laissierent leur pel.
                        Au jour d’ui nul ne se congnoit.