Balade 941 : Six poins firent Romme regner (MCCCLXXX)

Balade que six poins firent Romme regnier longuement

                        Six poins firent Romme regner
                        Et avoir toute seignourie.
                        Le premier, franchise ordonner.
                        Le bien commun, second, amer[1] ;
5                      Justice, tiers. Le quart, clergie.
                        Cinq, honourer chevalerie.
                        Six, remerir les bien faisans,
                        Gouverner par gens souffisans
                        Et saiges les estas de Romme.
10                    Ces six font les regnes puissans,
                        Le contraire destruit tout homme.
                       
                        Exemple des Rommains trescler :
                        Quant laissierent leur policie,
                        Et devindrent particulier,
15                    Tendans a leur bien singuler,
                        Lors sourdit orgueil et envie,
                        Querre entr’eulx, haineuse vie,
                        Traisons, plaiz, noises, contens.                                                         387c
                        Gouvernéz furent par enfans
20                    Les estas[2], la cité, et comme
                        Ces .vi. poins furent delaissans,
                        Le contraire destruit tout homme.
                       
                        Les provinces a reveler
                        Se prindrent en mainte partie.
25                    Aux Rommains si couvint cesser
                        Par leur foleur et ramener
                        En autre gent leur monarchie.
                        Et ainsi fut presques perie,
                        Tant qu’au jour[3] d’uy sont povres gens
30                    Empereurs, roys, princes, regens.
                        Leur foul gouvernement vous somme
                        D’avoir ces .vi. bons poins[4], disans :
                        Le contraire destruit tout homme.

[1] Ms. Clermont-Ferrand segondenier

[2] Ms. Clermont-Ferrand espers

[3] Raynaud édite aujour

[4] Ms. Clermont-Ferrand poins voirs