Balade 940 : Vous, Loys, filz de roy de France (MCCCLXXIX)
Lettres de Monseigneur d’Orliens par maniere de balade
Vous[1], Loys, filz de roy de France,
Duc d’Orliens, de Valois conte,
De Bloys, de Beaumont, congnoissance
Soit a ceuls que pité surmonte
5 Et qui[2] tous frans cuers vaint et dompte,
Qu’atendu la fragilité
D’Eustace et l’ancienneté,
Avec sa piteuse requeste,
Nous plaist qu’en yver et esté
10 Nous serve chaperon en teste.
Car trop li fait le froit[3] grevance,
Quant sur la cervelle li monte
Qui en son estomac s’avance,
Et avoit de raconter honte
15 Comment toux et reume sanz compte
Le tiennent en adversité.
De son toussir est grant pité,
Et par quoy sa fin ne soit preste,
Nous plaist qu’en yver et esté
20 Nous serve chaperon en teste.
Pour pité et pour remembrance
Des services que droit raconte
Que fait nous a en nostre enfance,
Dont nostre grace lui est prompte,
25 Sanz ce que nulz pour ce l’ahonte, 387b
Voulons pour garder sa santé
Qu’il n’ait ja chaperon osté,
Mais en jours communs et en feste
Nous plaist qu’en yver et esté
30 Nous serve chaperon en teste.
L’envoy
Chambellans, gens de nostre hosté,
Ne soit nulz de faire ahurté
Chose villaine et deshonneste
Au dit Eustace oultre son gré ;
35 Ce que nous avons acordé
Soit tenu, car sanz [nule] arreste
Nous plaist[4] qu’en yver et esté
Nous serve chaperon en teste.
[1] Raynaud corrige en Nous
[2] Raynaud corrige en que
[3] Ms. fer
[4] Ms. voulons
