Balade 939 : A vous, monseigneur d’Orliens (MCCCLXXVIII)
Supplicacion a Monseigneur d’Orliens par maniere de balade
A vous, monseigneur d’Orliens,
Treshumblement supplie Eustace
Que comme il soit des anciens
Voz serviteurs par longue espace
5 De temps, que de vostre humble grace,
Attendu la debilité
De son chief et fragilité,
Son estat, sa povre nature,
Qu’il ait par vostre autorité
10 Chaperon tant comme yver dure,
Sanz deffubler, car il n’est riens
Qui tant de mal en corps li face,
Ce dient les phisiciens,
Que le froit qui par son chief glace
15 En son estomac froit com glace,
Et lors a en duplicité
Toux et reume en tel quantité
Que c’est du raconter laidure.
Or ait donc par vostre pité
20 Chaperon tant comme yver dure,
Ou venir n’osera ciens
Jusqu’a ce que l’yver se passe,
Car du chief est si paciens
A present qu’a paine en respasse.
25 Et cilz est trop foulz qui trespasse
Et muert de froit par voulenté,
Et qui ne garde sa santé,
Car mort craimt toute creature.
Ait Eustace par vo bonté
30 Chaperon tant comme yver dure. 387a
L’envoy
Princes, la povre humanité
Pour honeur ne pour vanité
Qui ne lui vault, n’ait de ce cure
Puis qu’autre en ait debilité.
35 Laissiéz moy par humilité
Chaperon tout comme yver dure.
