Balade 938 : Qui veult le monde reformer (MCCCLXXVII)
Autre Balade comment on doit reformer ce monde par garder justice et amer le bien commun, etc.
Qui veult le monde reformer 386c
Et remettre en estat de grace,
Il fault le bien commun amer,
Que justice en tous cas se face,
5 Que nulz pour chose qu’il pourchace
N’ait fors que par election
Estat, office, audicion,
Par port, par priere ou achat,
Car par tel tribulacion
10 Vont toutes les choses de plat.
Que l’en entende a ramener
A nombre deu en toute place
Ce que l’en verra exceder
D’officiers, et que l’en se passe
15 A un bien prins, le trop efface,
Car plus font .vi. d’exaction
C’un seul et plus de mission,
Dont princes et peuples sont mat,
Et pour ce a mon oppinion
20 Vont toutes les choses de plat.
Face l’en prevostéz garder
Tant que le peuple se reface,
Et les finances gouverner
Par po de gent, car maint amasse
25 Des gouverneurs et sesoulace
En faire edificacion,
Chasteaulx en mainte region.
C’est ce qui seignurie abat
Par grans dons. En conclusion
30 Vont toutes les choses de plat.
Princes, soiéz en union,
Mettéz sur tout provision,
Faictes restraindre tout estat
En servant Dieu sanz fiction, 386d
35 Car par dissimulacion
Vont toutesles choses de plat.
