Balade 937 : O jeunes gent, servéz jeusne seignour (MCCCLXXVI)
Autre Balade de jeunes serviteurs de la court 386b
O jeunes gent, servéz jeusne seignour,
Puis qu’il aime les euvres de jeunesse.
Vous en aréz et proufit et honnour.
Mais homs saiges tel poursuite et court lesse,
5 Qu’entre telz gens ne sert que[1] de paresse
D’estre chargans. On moque de lui fort.
Impaciens de legier se courresse,
Car jeune et viel ne sont pas bien d’acort.
Le juesne est chault, mouvent pour sa chalour.
10 A tout deduit et voulenté s’adresse,
Sanz regarder la fin ne la dolour
Qui puet venir de fole hardiesse.
Cuider le suit, peril le point et blesse,
Et ne lui chault ne de droit ne de tort.
15 Il het chastoy en homme de viellesse,
Car jeusne et viel ne sont pas bien d’acort.
Et le viel est meur, a plain de froidour,
Saige et rassis, qui decline en foiblesse,
Qui jeune fut et recongnoist l’ardour
20 Et le peril de sa juene maistresse,
Qui blasme ceuls qu’elle tient en apresse,
Dont les pluseurs ont par elle esté mors.
Mais nulz pour ce sa foleur ne delesse,
Car josne et viel ne sont pas d’un acort.
L’envoy
25 Prince, le sens du viel homme radresse
Qui jeunes fut, et li jeunes se tort
De bon conseil par folie et radesse[2],
Car juene et viel ne sont pas d’un acort.
[1] Ms. fors que
[2] Ms. radresse
