Balade 936 : Au Roy, nostre sire, supplie (MCCCLXXV)
Balade au roy par maniere de supplicacion
Au Roy, nostre sire, supplie
Eustace Morel humblement
Que comme il ait toute sa vie
Vous servy bien et loyaument,
5 Voz predecesseurs ensement,
Et soit encor vostre bailli,
Dont pour l’estat tient avec li
Six chevaulx sur un franc de gaiges,
Cinq personnes et trois mesnaiges,
10 Senlis [et] Compiengne et Pontoise,
Et fault de l’un a l’autre voise
Sanz dons avoir, profiz ne seaulx,
Ne autres biens que nulz lui face,
Qu’il vous plaise, princes royaulx,
15 Sur ces poins estendre vo[1] grace.
Car voz baillis en Normandie
Ont leurs seaulx, et semblablement
En chascune senechaucie, 386a
En Champaigne pareillement.
20 Vermandoys [et] Amiens briefment,
Senlis[2] y ont a plain failli.
Bien deffendu, bien assailli :
Ce sont [la] trois megres bailliages
De grant nom. Les autres sont saiges :
25 On vent pour vous les seaulx et poise
De ces trois, sanz cri et sanz noise,
Chascun an, qui sont bons et beaux.
Or vous plaise donc a Eustace
Sanz l’assigner aux Generaulx,
30 Sur ces poins estendre vo grace,
Et lui donner, qu’il ne mendie,
.Vc. escuz presentement
Sur les exploiz de sa baillie
A Pontoise, [aussi] qu’om li rent
35 Son seel qu’ont anciennement
Eu si ancesseur jusqu’a cy,
Qu’onques pour vous l’en ne vendy,
Qui n’est pas trop grans avantaiges,
Car ses .vi. chevaulx sanz ses paiges,
40 Ses .xvi. sous, maille et pougoise,
Despendent et plus, dont li poise,
Sanz draps, nappes, liz et vaisseaulx
Qu’avoir lui fault en mainte place.
Vueilléz, ou li pert ses bateaulx,
45 Sur ces poins estendre vo grace.
L’envoy
Princes,.vi. ans a largement
Qu’Eustace n’ot dons ne argent
De vous : si fault qu’il se pourchace,
Car le sien chascun jour despent :
50 Or vueilléz donc[3] benignement
Sur ces poins estendre vo grace.
[1] Ms. vostre
[2] Ms. Et senlis
[3] Ms. doncques
