Balade 935 : Planne d’acier dont l’en fait les cerciaulx (LCCCLXXIV)
Autre Balade de la verdure des vins
Planne d’acier dont l’en fait les cerciaulx,
Ne besague aux deux douz aceree,
Fers de glaives, ne dagues de Bourdiaulx,
Rasoirs trenchans, faulx a faucher la pree,
5 Les ferremens dont on euvre en galee
Ne les hoyaux a racler parchemin,
Les aguilles qu’om vent par le chemin,
Ne dondaines qui trespercent le corps,
Ne se puelent comparer au vert vin
10 De l’an present, dont je suy presque mors.
Car quant j’en boy, destruis sont mes boiaux,
Mon estomac est plus froit que gelee,
Le ventre en ay emflé comme un pourceaux,
Et se ne fust la porte desfermee
15 Qui est dessoubz pour yssir la vinee,
Je mourusse du mal de saint Quantin.
Mais je pisse cent foiz soir et matin,
Et par dessoubz ne vois gaires moins hors.
Tel vinee me mettra a la fin
20 De l’an present, dont je suy presque mors.
Helas ! ou sont les vins especiaulx,
[Vins] de Beaune qui ont tel renommee,
Vins de Poitou, de Rin aux granz tonneaulx,
Vins de Tournuz, de pynos ceste anne, 385d
25 Vins d’Irancy, d’Aussonne et la contree,
Qui estoient de mon corps medicin ?
Le temps n’a pas pour eulx esté enclin,
Car Saturnus par son froit les a mors,
Dont a nous touz sont trop cruel voisin
30 De l’an present, dont je suy presques mors.
L’envoy
Bachus, doulz Dieux, je n’ay mes que les peaulx,
Je suy destruit par ces faulx vins nouveaulx
Qui ne sont sain ne biaux ne bons ne fors,
Mais sont plus durs qu’enclumes ne marteaulx.
35 Riens ne valent en celiers n’en bateaulx
De l’an present, dont j suy presque mors.
