Balade 934 : Chascuns dit que trestout va mal (MCCCLXXIII)
Balade
Chascuns dit que trestout va mal
Et que tout yra encor pis
Pour noz pechiéz en general,
Et si n’est nulz a mon advis
5 Qui s’en admende entre les vis,
Mais sont en mal perseverent
Ly saige, ly plus reverent,
Tant seculiers comme d’eglise
Par couvoiter qui les sousprant,
10 Car il n’est riens qui leur souffise.
Que dient de court curial ?
Que nulz prodoms n’y est cheris.
Que dient pappe[1] et cardinal ?
Que par eulx est grant contens mis
15 En l’eglise. Et si sont remis
D’y pourveoir. On vent, on prant.
Mal pour biens chascun jour se rent
Aux vertueus. Chascun se prise.
Ly riche sont li plus dolent,
20 Car il n’est riens qui leur souffise.
Que dient li juge royal ?
Que justice n’a loy ne dis.
Que dient clerc imperial ?
Que li Empire[s] est laidis
25 Et qu’om applique les escrips
Au rebours de l’entendement.
Et cilz qui deust voir dire ment,
Et que tout passe soubz faintise.
Dieux ne doit donc amer tel gent,
30 Car il n’est riens qui leur souffise. 385c
L’envoy
Princes, tout yra povrement,
Et on le voit ja clerement,
Car tout dechiet et apetise,
Gens et chevaulx, or et argent,
35 Par aucuns, c’est vray jugement,
Car il n’est riens qui leur souffise.
[1] Ms. pappes
