Balade 933 : Puis que Loy et Justice fault (MCCCLXXI)
Autre Balade
Puis que Loy et Justice fault 385a
Et qu’elle est ja presque faillie,
L’en congnoist bien par le default
Que toute chose yert assaillie :
5 Couvoitise qui les cuers lie
Esmouvera contemp et guerre,
Baras couvers, contumelie :
Las ! ou pourra l’en seur lieu querre ?
Le fort fera au foible assault,
10 Sanz foy yert la loy envahye
Qui ja par le scisme deffault,
Par povreté qui est haye,
L’estat, la couvoiteuse envie
Des princes de l’eglise en terre :
15 Puis qu’ilz [laissent] la sainte vie
Las ! ou pourra l’en seur lieu querre !
Quant le creatour de la hault
Qui par mains tourmens nous chastie,
Voit que tout son chastoy n’y vault,
20 Mais perseverons en folie,
Veult que nostre erreur soit pugnie :
L’un fera par l’autre requere
En destruisant la monarchie.
Las ! ou pourra l’en seur lieu querre !
L’envoy
25 Prince, raison est asbahie
Qui s’en fuit de mainte abbaye
Et qui aux cours de present n’erre.
Justice muert, Pité la crie,
Et Volenté regne en partie :
30 Las ! ou pourra l’en seur lieu querre ?
