Balade 932 : Amour, paix et humilité (MCCCLXX)
Autre Balade sur l’amour qui est aux cours royaulx
Amour, paix et humilité,
Atrempance et devocion,
Abstinance avec charité,
Vertu, toute parfection,
5 Crainte de Dieu sanz fiction, 384d
Sont au jour d’ui est cours royaulx
Des princes, pappes, cardinaulx,
Justice, equité et tout bien,
Et pour ce n’aviennent nulz maulx :
10 S’il est ainsi, Dieu le scet bien.
L’un a de l’autre a court pité
Sanz envie et detraction.
La se dit tousjours verité,
La n’a dissimulacion,
15 Couvoitise n’ambicion.
La sont honouréz cueurs loyaulx,
La sont pugnis les desloyaulx,
La sont cheri ly ancien
Preudomme, non pas les nouveaulx :
20 S’il es tainsi, Dieux le scet bien.
Tout selon leur proprieté
Se regle a leur intencion.
Point n’a peuple d’adversité ;
On ne fait nulle extorcion,
25 Peché ne fornicacion.
Uny sont les ecclesiaux,
Les droiz regnent imperiaulx,
Et souffist a chascun le sien
Sanz vouloir or, argent joyaulx :
30 S’il est ainsi, Dieux le scet bien.
L’envoy
Prince, tout est en unité,
En paix et en transquilité.
Sanz erreur sont li crestien.
La foy, la loy, divinité
35 Ont effect et toute bonté :
S’il est ainsi, Dieu le scet bien.
