Balade 931 : Qui veult besongner, sache a qui (MCCCLXIX)
Autre Balade
Qui veult besongner, sache a qui
Et qu’il ait chevance et pouoir
D’accorder, de livrer aussi
Et que l’en voulra promouvoir,
5 Car l’on se pourroit decevoir
Par traicter a maint parlement,
Qui ne traicteroit seurement.
L’en doit sçavoir a qui on trecte,
Car qui le fait impourveument 384c
10 On en pert mainte foiz sa debte.
Qui besoing a, il est garny
De sens pour l’autrui recevoir,
Et n’espargne parent n’ami
Dont il puisse finance avoir.
15 Mençonge dit et taist le voir,
Rente veut pardurablement
Ou a vie communement.
Lors est obligacion fecte
Sur povre et petit fondement :
20 On en pert mainte foiz sa debte.
Trop de vendeurs le font ainsi
En faingnant qu’ilz ont grant avoir,
Et an mariage autressi
Le font traicteur, si que li oir[1]
25 Du mariage apercevoir
Pensent, puis le decevement
Du douaire, de quoy on ment :
Foul est qui a telz gens contrecte,
Car qui ne le fait cautement,
30 On en pert mainte foiz sa debte.
L’envoy
Princes, bon fait sçavoir comment,
Pour quoy et a qui on se prant,
Qu’on enquiere bien, qu’on se guette
Qu’avoir n’y puist decevement,
35 Car puis qu’on le fait autrement,
On en pert mainte foiz sa debte.
[1] Ms. air
