Balade 930 : Les minieres d’or et d’argent (MCCCLXVIII)
Balade comment les finances de ce royaume sont mal gouvernees
Les minieres d’or et d’argent
Commencent trop fort a tarir,
Ce dient mineurs et la gent
Qui seulent tel metal querir.
5 L’en ne pourra es coings ferir,
Pour ce que la matiere fault,
Qui d’un pays en autre sault
Sanz retourner en la miniere ;
Et puis qu’il en sera deffault,
10 Qui n’ara argent, si en quiere.
Maint peuple sera indigent
Dont la mette souloit yssir,
Et retourner aucunement,
Qui plus ne se sçara chevir.
15 Povre le faura devenir, 384b
Estat cesser, avoir l’assault
L’un a l’autre, car ce deffault,
Dont on ot largesse planiere
Jadis, mais aux mineurs n’en chault.
20 Qui n’ara argent si en quiere ;
Car puis qu’ainsis soudainement
L’or se depart sanz revenir
Par donner excessivement,
Par trop granz estaz maintenir,
25 Par chetives gens retenir,
Par leur bailler estat trop hault,
Par laisser saige homme qui vault,
Par les vaillans bouter arriere,
Tout se pert. Soyons sur ce caut :
30 Qui n’ara argent si en quiere.
L’envoy
Prince, donner fol largement
Et despendre oultrageusement,
Estat tenir plus[1] qu’il n’affiere,
Faire des bons reboutement
35 Feront dire dolentement :
Qui n’ara argent si en quiere.
[1] Ms. et plus
