Balade 929 : Qui bien sçavoir veult l’art de theorique (MCCCLXVII)
Balade comment tout homme de pratique doit parler selon rethorique
Qui bien sçavoir veult l’art de theorique,
Avant qu’il soit bon rethoricien,
.iiii. poins fault avoir en sa pratique :
Parler briefment, en substance et [en] bien,
5 Hardiement, saigement[1], et que rien
Ne soit obmis qui a son fait affiere.
Par membres doit divisier[2] sa matiere,
En tout moien moustrer s’entencion
Par douce voix et par seure maniere :
10 Rethorique a en ce parfection.
Qu’il soit fondé en gramaire, en logique,
Qu’il ait veu maint acteur ancien,
Valerium, Tulle et Policratique,
Tite Live, Seneque et Pricien,
15 Virgile aussi, Socratés, Lucien,
Qui de parler a droit furent lumiere.
Sanz dire mot [ne] devant ne derriere,
Fors que tous jours faire vraie oroison :
En tous leurs diz s’il est qui bien y quiere,
20 Rethorique a en ce parfection.
Et qui delesse ou fuit par voie oblique
Ces .iiii. poins, qui sont li vray moye
De bien parler, ou l’un d’eux, il s’embrique, 384a
Si comme fait le foul phisicien
25 Qui veult ouvrer, et n’est praticien
Es corps humains, dont pluseurs sont en biere.
Qui l’art ne scet, en celli ne se fiere
Pour en ouvrer, car c’est perdicion.
Ces .iiii. poins donc retiengne et acquiere :
30 Rethorique a en ce parfection.
L’envoy
Parler briefment [et] saigement l’applique
Hardiement en substance et si que
Ces .iiii. poins mis en conjunction
Font renommer et faire homme authentique
35 En prononcent[3] voix[4] de douce fabrique :
Rethorique a en ce parfection.
[1] Ms. et saigement
[2] Raynaud corrige en diviser
[3] Raynaud corrige en prononçant
[4] Ms. par voix
