Balade 928 : O jugement et vengence divine (MCCCLXV)
Autre Balade de la divine vengence
O jugement et vengence divine,
Abysme et puis ou il n’a point de fons
Pour ceuls qui ont de pechié la racine,
Perseverens ! O ! comme orribles sons
5 De cris, de plours et de souspirs parfons
Seront gettéz pour la pugnicion
Des corps mauvés ! Nulle redempcion
N’est en enfer aux damnéz esperis :
Vivans faisons nostre salvacion,
10 Ou tous serons condempnéz et peris.
Dieu seuffre un temps noz maulx comme benigne,
No mort ne veult, mais que convertissons
Nos cuers a lui par reprentence digne,
Et repentens en bien faire vivons.
15 Mais aussi tost que nous perseverons
Sanz repentir, vient no perdicion,
Soudaingement en la destruction
D’ame et de corps. La sont noz maulx meris.
Or faisons bien et en contriction, 383b
20 Ou tous serons condempnéz et peris.
Las ! ne creons en divin n’en divine
Fors en vray Dieu de qui l’ymaige avons.
Gardons sa loy, ensuions sa dotrine
De tout no cuer, et de l’ame l’amons.
25 Que dit saint Pol ? Sa justice doubtons,
Qui soudaine est et l’execucion
Que l’en a veu en mainte region
Sur empereurs, rois et empereris,
Et autre gent. C’est ma conclusion,
30 Ou tous serons [con]dampnéz[1] et peris.
L’envoy
Prince, pour Dieu aux exemples visons,
Aux tempestes, aux inundacions
Et aux pechiéz dont nous sommes repris,
Aux mors des gens, aux persecucions.
35 Et de nos maulx vers Dieu nous appaisons,
Ou touz serons [con]dampnéz[2] et peris.
[1] Raynaud édite condemnez
[2] Raynaud édite condemnez
