Balade 927 : Fevre, charpentier et maçon (MCCCLXIV)
Autre Balade
Fevre, charpentier et maçon,
Paintre, manouvrier, escripvain
Ne puelent par juste façon
Faire ouvraige qui ne soit vain,
5 S’esquierre n’ont ou ligne en main
Et fourme selon leur ouvraige,
Pour mener droit leur maçonnaige,
Leur bois escarrir et planer,
Plommer a plom chascun estaige :
10 On ne puet bien sanz regle ouvrer.
Et qui le fait, veoir puet on
Que l’edifice n’est pas sain,
Perdre y fault matere et sablon
Et chiet tout par un cas soudain.
15 Tele euvre ne firent Ronmain.
Par regle ouvrerent comme saige.
En gouvernement de mesnaige,
En guerre, sur terre et en mer
Tout soubmirent a leur usaige :
20 On en puet bien sanz regle ouvrer.
A gouvernement ramenon
Des princes chascun art mondain,
Et ses euvres intepreton.
Et nous trouverons pour certain 383a
25 Que, se le chief et souverain
Qui le peuple a en seignourage,
Ne gouverne en non[1] et langaige
Par justice et regle donner,
Peuple perdra et heritaige :
30 On ne puet bien sanz regle ouvrer.
L’envoy
Prince, voulenté et oultraige
Aux faisans font trop de dommaige :
Sanz regle ne puet nulz durer.
Or soyons de ferme couraige,
35 Car, si comme dient li sage,
On ne puet bien sanz regle ouvrer.
[1] Ms. ce non
